ماذا يعني لك فندق خمس نجوم؟
في ناس كثير تسمع وماتدري والبعض يعرف والبعض شبة عارف معنى تقييم الفنادق بالنجوم، شنو يعني نقول الفندق نجمتين أو ثلاث أو أربع أو خمس نجوم؟
بالنسبة للسؤال، من أول الأسئلة اللي تمر عليك بهالموضوع هم:
عالمياً منو يحدد هالفندق تقييمه كذا نجمة؟
الجواب: اني استغربت انه ماكو نظام عالمي ثابت متفق عليه بخصوص تقييم الفنادق بالنجوم. يعني في دول تختلف بأسس تقييمها عن دول ثانية، خاصة بين أمريكا ودول أوروبا. بدول أوروبا غالباً في مكاتب حكومية تدير هالشغله وتهتم بالتقييم، بس بأمريكا منظمات مختلفة. بأمريكا السالفة متوزعة بين مجموعة منظمات متفرقة مستقلة عن بعضها البعض (بس مرخصة حكومياً).
يعني باختصار ماكو جهة معينة عالمية ثابتة نروح عندها وتقيّم الفندق جم نجمة. في كثير منظمات بس لي الحين مو عالمية كفاية ولا معترفين فيها بشكل رسمي بهالمجال، وتقييم هالمنظمات مختلف بينهم بين بعض، يمكن منظمة تعطي فندق 5 نجوم
ومنظمة ثانية تعطيه 4.
مع هذا تبقى بعض الأساسيات بالتقييم محد يقدر ينكر أهميتها بالحسبه، مثل: حراسة أمنية 24 ساعة، مطابقة المبنى لقواعد الأمن والسلامة، مساحة الغرف، جودة الأثاث المستخدم، الألوان، الإضاءة، الديكور، الأجهزة المتوفرة،،،
هذي العوامل المعروفة، بس يمكن محد فكر انه موقع أو منطقة الفندق نفسه مرات يدش بالحسبه، سهولة المدخل حق الفندق، المنظر اللي يطل عليه الفندق، توفر المصاعد، عندهم نادي صحي، صالون تجميل، صالة استقبال واسعة، عندهم حوض،…الخ.
مع كل الاختلافات نقدر نلقى نمط عام حق التقييم الموجود، يتلخص كالتالي:
نجمة – توفير الحاجات الأساسية، غرفة فيها فراش وتكرمون حمام، ولا يصير ببالكم دام انه نجمة وحده يعني لازم وصخ ويلوّع الجبد، ماله علاقة أصلاً، يمكن يكون نجمة بس نظيف ومرتب ما عليه مشاكل، بس انه محدود بغرفة وحمام وسلة زبالة وهالسوالف الأساسية. تلقى مافي مطعم بهالفندق والخدمة شوي متواضعة حيل باللي تقدمه حقك. نجمتين – أساسيات وشوي زيادة، مثل النجمة بس شوي أحسن، مثلاً تلقى تلفون وتلفزيون وهم خدمة غرف شوي أحسن، مرات يكون عندهم مطعم بالفندق وخدمة تنظيف الغرف يومياً ثلاث نجوم – حق الراحة، غالباً حق الشركات الفندقية المشهورة. العادة يكون عندهم مطاعم زينه ونادي صحي وخدمات أعمال وقاعات اجتماع وتوصيل وخدمة غرف …الخ. يهتمون بالأثاث ومساحة الغرفة تكون كبيرة نسبياً ودايما يراعون اللمسة العصرية بالديكور. الفنادق بثلاث نجوم تستهدف أكثر شي اللي يسافرون لحاجات العمل والشركات. أربع نجوم – قمة الراحة، هنا توجد عالفخامة. الفندق بهالمستوى يكون ضخم، فخم، ويلق لق من بعيد، يعطي خدمة مثالية وإضافات كثيره عشان يضمن راحتك. مثل مستحضرات تجميل حق السيدات يوفرونها بالغرفة والفرش يكون راقي مهتمين فيه بشكل كبير. غالباً يوفرون مو بس حوض واحد، أحواااض! جاكوزي وسونا، مطاعم فاخرة، سيارات ليموزين، نوادي صحية غالية. خمس نجوم – دلع و ولع! كل شي خيالي فوق الأربع نجوم تحصله هني. مو بس يهتمون بالخدمة والأثاث، حتى البنيان لازم يكون روعة وشي مميز. دام انت عندهم المفروض ما تحرك صبعك أصلا إلا اللهم يوم بدك تشيل فيه كرت الفيزا عشان تدفع. مو غريبة إذا يكون عندهم ملاعب تنس وملعب غولف ووجبات الكافيار وياجي الخرابيط اللي نسمع عنها بالأساطير الأغريقية واليونانية. واللي اكثر من خمس نجوم؟
بشكل عام عالمياً الحين التقييم المنتشر يكون من نجمة إلى خمس نجوم، بس مثل ما سمعنا فندق برج العرب بدبي معطي روحه 7 نجوم! وهم فندق Town House Galleria بميلان. بس هالتقييم منهم ولهم، مافي شي اسمه 7 نجوم، رسمياً أهم خمس نجوم بس معطين روحهم سبع نجوم بالكلام. انا ادري ومتأكد انهم أقوى من الفنادق الخمس نجوم العادية، بس هم ما نقدر نقول كلمن سوى شي جديد يقدر يألف تقييم حق روحه.
وبالأخير اقول في مشروع اسمه (World Hotel Rating) راح يبدي بخصوص توحيد تقييم المشاريع الفندقية في أنحاء العالم وتحديد الأساسيات المعتمدة في التقييم، صج البداية تجريبية بس بادرة خير ان شاء الله عشان نفتك من هاللخبطة.
[color][font]
[/font][/color]
ـــــــــــــــــــــــــــــــــــــــــــــــــــــــــــ تـوقـيــعــي ــــــــــــــــــــــــــــــــــــــــــــــــــــــــــــــ
كُل مُبْتَسِم لَآ يَعْنِي أَنَّه سَعِيْد !
و كُل بَشُوش لَآ يَعْنِي أَنَّه قَد خَلَت دِنْيآه مِن الْدُّمُوْع !!
. . . ف حَتَّمَآ هُنَآك " أَقْنِعـه " مَجْبُوْرُوْن عَلَى إِرْتِدآئِهَآ ،
لَآ تَعْنِي ب أَنَّنَآ منَآفقُوُون ،، لآآِآ
فَقَط حَتَّى يُطَلِّق عَلَيْنَآ ( بَشِّر طَّبِيُعُيُّون )
و حَتَّى عَن إنّكِسِآرنَآ لَآ يَعْلَمُوْن !
الرئيسية 
أحدث الصور 
التسجيل 
دخول 
